អ្នកប្រដាល់ជួរមុខកម្ពុជាពីររូបរួមមានកីឡាករ ធឿន ធារ៉ា និង ឡៅ ចន្ទ្រា ម្ចាស់មេដាយមាសជើងឯកថ្នាក់ជាតិឆ្នាំ២០១៧ ត្រូវបានសហព័ន្ធកីឡាប្រដាល់គុនខ្មែរជ្រើសរើសឲ្យហ្វឹកហាត់ក្នុងក្រុមជម្រើសជាតិឆ្នាំ២០១៨។ ក្រៅពីរូបគេទាំងពីរនាក់នេះ ក៏មានកីឡាករ៨នាក់ផ្សេងទៀតផងដែរ។
អ្នកលេងគុនខ្មែរមកពីខេត្តព្រៃវែង ធឿន ធារ៉ា ម្ចាស់មេដាយមាសជើងឯកថ្នាក់ជាតិឆ្នាំ២០១៧ ក្រោយយកឈ្នះអ្នកលេងកណ្តាប់ដៃ រឿង សោភ័ណ្ឌ នៅវគ្គផ្តាច់ព្រ័ត្រ និងជើងខ្លាំងជួរមុខកម្ពុជា ឡៅ ចន្ទ្រា ត្រូវបានសហព័ន្ធកីឡាប្រដាល់គុនខ្មែរជ្រើសរើសឲ្យចូលហ្វឹកហាត់ក្នុងក្រុមជម្រើសជាតិកីឡាប្រដាល់គុនខ្មែរឆ្នាំ២០១៨។
អ្នកលេងកែងមកពីក្លិបក្រសួងកសិកម្ម ធឿន ធារ៉ា ជាកីឡាករមានសមត្ថភាពខ្ពស់ ដែលបាននិងកំពុងសាងភាពល្បីល្បាញទាំងនៅលើជាតិជាតិ និងអន្តរជាតិ។ ពិសេសលើសង្វៀន Muay Thai រូបគេ តែងតែផ្តួលដៃគូឲ្យសន្លប់ក្រោមផ្លែកែងដ៏មុតស្រួចរបស់គេ។ ជាក់ស្តែងកាលពីអំឡុងខែមករា ថ្មីៗនេះ រូបគេ ទើបតែផ្តួលកីឡាករថៃឲ្យសន្លប់ក្នុងទឹកទី២នាសង្វៀន Muay Thai។
ក្នុងព្រឹត្តិការណ៍ដូចគ្នាកាលពីអំឡុងខែឧសភា ឆ្នាំ២០១៧ ធឿន ធារ៉ា បានផ្តួលកីឡាករថៃ Iklang Muaythaisamchaigym ឲ្យសន្លប់ត្រឹមទឹកទី២រហូតប្រើគ្រែស្នែងសែងចេញពីសង្វៀនប្រកួត។ ហើយកាលពីថ្ងៃទី១២ កុម្ភៈ ឆ្នាំ២០១៧ ធារ៉ា បានផ្តួលកីឡាករថៃ Petchtongchai Sor.seubsak ដោយប្រើកែងឲ្យសន្លប់ត្រឹមទីកទី២ផងដែរ។
កាលពីពេលថ្មីៗកន្លងទៅអ្នកលេងគុនខ្មែរមកពីក្លិបក្រសួងកសិកម្មរូបនេះ បានក្លាយកីឡាករគូឯកប្រចាំសង្វៀន Max Muay Thai។ នេះជាលើកទី១ ដែលអ្នកលេងគុនខ្មែរមានប្រភពមកពីខេត្តព្រៃវែងរូបនេះ ជាប់ជាកីឡាករជម្រើសជាតិកីឡាប្រដាល់គុនខ្មែរ បន្ទាប់ពីរូបគេជាម្ចាស់មេដាយមាសជើងឯកថ្នាក់ជាតិឆ្នាំ២០១៧។
ក្រៅពីអ្នកលេងគុនខ្មែរជួរមុខកម្ពុជាពីររូបខាងលើ ក៏មានកីឡាករជម្រើសជាតិ៦រូបផ្សេងទៀតផងដែររួមមានកីឡាករ ម៉ឺន សុភា, ឃីម ឌីម៉ា, ឡៅ ចិត្រា, វ៉ាន់ វឿន, ហ៊ឹម សេរី និងកីឡាករ សែម សំណាង។ គួរបញ្ជាក់ថា កីឡាករជម្រើសជាតិគុនខ្មែរឆ្នាំនេះ សុទ្ធសឹងជាម្ចាស់មេដាយមាសការប្រកួតជើងឯកថ្នាក់ជាតិឆ្នាំ២០១៧។ កីឡាករទាំងនេះ ត្រូវបានបង្វឹកដោយ លោក អេ ភូថង ដែលមាន លោក ពិន សំណាង ជាគ្រូជំនួយ៕
No comments:
Post a Comment